Aduh! Astaghfirullah !! tereak enyak aye yang baru ajé keluar dari kamar mandi.

“Knapé nyak!??,
“Tangan gue kesetrum niih.”
“emang enyak lagi ngapain??”
“Mao matiin mesin aér, Din. Gue abis mandi, ntu kolem udeh penuh.”
“Tangannye masih basah kali tuh. Laén kali klo mo cabut colokan aér, lap dulu tangannye.”

Besoknya....

“Waduh!!!”
“Nape luh ???” tanya empok aye nyang lagi nonton tipi.
“Gue Kesetruum niih, gue mo matiin mesin aer”
“Wah, tangan luh basah tuh. Ati-ati dong!!”

Besoknya lagi sepulang aye dari tempat kerjé, aye niatnye mo mandi sore. Tapi trus mata aye malahan ngeliatin cable power-nya mesin aer, karena ada yang aneh tuh dan juga lucu. Kabel deket kepala stekernya dibalut pake kertas sampe tebel banget. “Wah ini pasti kerjaannye si Babeh” kata aye dalam ati. Tiba-tiba Babeh aye dateng dari luar, trus die ngeliatin aye nyang lagi pegang-pegang ntu kabel sambil keheranan.

“Itu kabel ada yang tekelupas, tadi gue kena kesetrum juga jadi gue tambel.” Kata si babeh buat menghapus keheranan aye.

“Lah, nambelnya kok begini beh, kagak kuat ntu mah.” Sahut aye
“Iye, gue juga tau. Kan buat sementara aja. Lagian gue nyari selotip item kagak ketemu-temu. Jadi sambil nungguin elu pulang, gue benerin seadanya aja deh.”

“Besok aje deh Beh aye benerinnya, sekarang aye mo mandi duluw. Aye mao kondangan duluw nih ke kawinannye si Herman.”

“Kalo gitu, entar pulangnye sekalian lu beli seloptip item buat nambel kabelnya.”
“Beres Béh, kalo perlu kabelnya aye ganti deh semuanyé.”

Sampe dua hari setelah itu, kabelnya belon juga diganti karena aye lupa terus mampir di warung buat beli selotip itemnye.